سپريم ڪورٽ سنڌ ۾ نيب جون وڌيڪ 3 عدالتون قائم ڪرڻ بابت جاري سنڌ هاءِ ڪورٽ جي فيصلي کي ايندڙ حڪم تائين معطل ڪري ڇڏيو

سپريم ڪورٽ سنڌ  ۾ نيب جون وڌيڪ 3 عدالتون قائم ڪرڻ بابت جاري سنڌ هاءِ ڪورٽ جي فيصلي کي ايندڙ حڪم تائين معطل ڪندي سڄي سنڌ ۾ موجود احتساب عدالتن ۾ ٻڌڻي هيٺ ڪيسن جو تفصيل طلب ڪري ورتو، سپريم ڪورٽ ڪراچي رجسٽري ۾ ٻن ميمبرن واري بينچ سڄي سنڌ ۾ نيب جون وڌيڪ 3 عدالتون قائم ڪرڻ جي معاملي تي جاري هاءِ ڪورٽ جي فيصلي خلاف وفاقي قانوني واري سيڪريٽري پاران داخل اپيل جي درخواست تي ٻڌڻي ڪئي، عدالت اڳيان ڊپٽي اٽارني جنرل موقف اختيار ڪيو ته سنڌ ۾ 6 عدالتون ڪم ڪري رهيون آهن، 6 عدالتن ۾ ڪل 257 ريفرنس ٻڌڻي هيٺ آهن، ڊپٽي اٽارني جنرل وڌيڪ موقف اختيار ڪيو ته سنڌ ۾ وڌيڪ نيب جون عدالتون قائم ڪرڻ جي ضرورت نه آهي، ٻن ميمبرن واري بينچ سنڌ هاءِ ڪورٽ جي فيصلي کي ايندڙ حڪم تائين معطل ڪندي سڄي سنڌ ۾ موجود احتساب عدالتن ۾ ٻڌڻي هيٺ ڪيسن جو تفصيل طلب ڪيو آهي، عدالت پاران پنهنجي حڪم ۾ چيو ته ٻڌايو وڃي ته ڪهڙي عدالت ۾ ڪيترا ڪيس ٻڌڻي هيٺ آهن، ڪهڙي ڪيس ۾ ڪيترن شاهدن جا بيان قلمبند ٿي چڪا آهن ۽ ڪهڙو ڪيس ڪهڙي پوزيشن تي آهي، سموري تفصيلي کان عدالت کي ايندڙ ٻڌڻي تي آگاهه ڪيو وڃي.